Aqaaid

Targeebi Baat

Hadees : Hazrat Umar (رضي الله عنه) bayaan karte hain ke hum Rasoolullah (ﷺ) ki khidmat mein haazir the, ek shakhs ne aa kar Aap (ﷺ) se dariyaaft kiya ke mujhe bataaiye Imaan kya hai? Aap (ﷺ) ne farmaaya : Imaan yeh hai ke tum Allah ko, us ke farishton ko, us ki kitaabon ko, us ke Rasoolon ko aur qiyaamat ke din ko haq jaano, haq maano aur har achchhi buri taqdeer ko bhi haq jaano, haq maano.

[Muslim : 102, Umar (رضي الله عنه)]

Islaam mein aqaaid ki bahot ziyaada ehmiyat hai, balke deen ki buniyaad hi aqaaid par rakhi gayi hai, yahi wajah hai ke jab bhi kisi qaum ke aqaaid mein fasaad aur bigaad paida huwa, to un ki islaah ke liye Allah Ta'ala ne Nabi aur Rasool ko mab'oos farmaaya, saare paigambaron ne apni qaum ko aqaaid durust karne aur saheeh aqeede par mazbooti ke saath jame rehne ki daawat di, Qur'aan wa Hadees mein bhi aqaaid ke mut'alliq baatein intihaayi wazaahat ke saath aur bade muassir andaaz mein bayaan ki gayi hain, jaise : Allah ki wahdaaniyat aur us ki zaat wa sifaat par Imaan laana, aasmaani kitaabon aur Rasoolon ke barhaq hone ka yaqeen rakhna, Aap (ﷺ) ke aakhri Nabi hone aur Qur'aan ke aakhri aasmaani kitaab hone ka aqeeda rakhna aur farishton aur aakhirat ke din par Imaan laana wagaira. Ek jagah Allah Ta'ala ne irshaad farmaaya: Aye Imaan waalo! Allah par Imaan rakho aur us ke Rasoolon par aur us kitaab par jo Allah ne apne Rasool par utaari hai aur har us kitaab par jo us ne pehle utaari thi aur jo shakhs Allah ka, us ke farishton ka, us ki kitaabon ka, us ke Rasoolon ka aur yaume aakhirat ka inkaar kare, to woh bhatak kar gumraahi mein bahot door ja pada

[Sura-e-Nisa:136]

Aqeeda ek aisi buniyaadi cheez hai, jis mein zarra baraabar bhi kami wa ziyaadati ki gunjaaish nahin hoti aur thoda sa tazalzul bhi bade khasaare aur nuqsaan ka baais hota hai. Aqaaid se aamaal ka bhi bahot gehra t'alluq hai, bade se bada amal bhi Allah ke yahaan aqaaid ki durustagi ke bagair qubool nahin hota hai,

Masalan: Agar koi aadmi Allah ko na maane, us ke saath kufr wa shirk kare, ya Huzoor (ﷺ) ko aakhri Nabi aur Rasool tasleem na kare aur Aap (ﷺ) ke baad kisi bhi tarah se Nabi keaane ka aqeeda rakhe, to phir woh shakhs chaahe jitna achchha kaam kare, Allah Ta'ala ke yahaan badle ka mustahiq nahin hoga aur use koi sawaab nahin milega. Is liye humein aqaaid par poori mazbooti ke saath jame rehne aur un ko apne dil mein bithha lene ki zaroorat hai taake humaara lmaan durust rahe, Allah ke nazdeek humaara amal qubool ho aur phir humein us ka behtareen badla naseeb ho.