Qur'aan wa hadees

ASALAAMU 'ALAIKUM WA RAHMATULLAHI WA BARAKAATUH

Islaam

Allah Ta'ala ne tamaam insaanon ki Duniya ki zindagi aur Aakhirat yaani marne ke baad ki zindagi ki kaamyaabi sirf "Deen" mein rakhi hai aur "Deen" ke mashhoor paanch shobe hain : 

1) Imaaniyat 2) Ibaadaat 3) Muaamlaat 4) Muaasharat 5) Akhlaaqiyaat.

In tamaan shobon par Allah Ta'ala ke hukm aur us ke aakhri Nabi Hazrat Muhammad (ﷺ) ke tareeqe ke mutaabiq zindagi guzaarne ko "Deen" kehte hain. Yeh "Deen" hamein insaaniyat sikhaata hai. Is Deen par chalne waala ek achchha musalmaan, ek achchha insaan aur ek achchha shehri banega. Isi Deen par chal kar woh donon jahaan mein kaamyaab hoga.

Deen par mukammal taur par amal ke liye Deeni taaleem haasil karna aur Islaami ahkaam ko seekhna zaroori hai, is liye har shakhs par yeh farz hai ke Deeni taaleem ko haasil kare, neez woh school, college aur deegar masroofiyaat mein lage huwe hain, apne auqaat ka kuchh hissa faarig kar ke is taraf tawajjah karein aur kam az kam Islaam ki ahem aur bunyaadi taaleem haasil karne ki poori koshish karein, taake apni zindagi ko islaami ahkaam ke mutaabiq guzaar kar kaamyaab ho sakein.

Is ke saath Ummat-e-Muslima ki yeh azeem zimmedaari hai ke woh Imaan-o-Islaam ki daulat ko logon tak pahonchaaye, naawaaqif logon ko Deen ka ilm sikhaaye, unhein khair-o-bhalaai ka hukum de aur buri baaton se roke.

Allah Ta'ala ka irshaad hai : Tum woh behtareen Ummat ho jo logon ke faaide ke liye wujood mein laayi gayi ho. Tum neki ki talqeen karte ho, buraai se rokte ho aur Allah par Imaan  rakhte ho.

                                                                       [Aal-e-Imraan : 110]