Naazira-e-Qur'aan

Naazira-e-Qur'aan : Qur'aan-e-Kareem dekh kar padhne ko "Naazira-e-Qur'aan" kehte hain.

Targeebi Baat

Hadees : Rasoolullah (ﷺ) ka irshaad hai ke jo shakhs Qur'aan padhe aur us par amal kare, to us ke waalidain ko qiyaamat ke din aisa taaj pehnaaya jaayega, jis ki roshni sooraj ki roshni se bhi ziyaada hogi, agar woh (sooraj) tumhaare gharon mein ho, to tumhaara us shakhs ke baare mein kya khayaal hai, jo khud us par amal karne waala ho.

[Abu Daawood: 1453, Mua'az (رضي الله عنه) ]

Faaida: Jab waalidain ke liye yeh inaam hai, to amal karne waale ka inaam is se kaheen ziyaada hoga, lihaaza humein Qur'aane Kareem ki khoob tilaawat karni chaahiye; taake hum ziyaada se ziyaada sawaab kama kar apni aakhirat ki zindagi sanwaar sakein; is liye ke wahaan rupye aur paise kaam nahin aayeinge, balke yahi nekiyaan aur ajr-o-sawaab kaam aayega.