Hifz-e-hadees

Targeebi Baat

Hadees : Rasoolullah (ﷺ) ne farmaaye: Behtareen kalaam kitaabullah hai, aur behtareen tareeqa Muhammad (ﷺ) ka tareeqa hai. Bad tareen kaam nai nai baatein (Bid'atein) hain aur har bid'at gumraahi hai.

[Muslim: 2042]

Allah Ta'ala ne saare insaanon ki hidaayat ke liye Qur'aan naazil farmaaya. Rasoolullah (ﷺ) logon ko yahi Qur'aan padh kar sunaate aur us ki tashreeh wa tafseer bayaan karte, jo baat bhi bolte bilkul haq aur sach farmaate kyun ke sab Allah ki taraf se hoti. Apni khwaahish aur ji se kuchh na farmaate. Jo baat irshaad farmaate us par amal bhi kar ke bataate. Aap ﷺ ki inhin baaton aur kaamon ko Hadees kaha jaata hai.

Rasoolullah (ﷺ) ke jaan nisaar sahaaba Aap ki baatein bahot adab aur dhyaan se sunte,us ko yaad rakhte us par amal karte aur doosorn tak woh baatein pohnchaate. Isi tarah Sahaaba ke shaagirdon ne bhi kiya, sahaaba ke shaagirdon ke shaagirdon ne bhi aisa hi kiya is tarah hote hote yeh ilm ka khazaana bilkul hoobahu ham tak pohncha. Is liye hamein yeh yaqeen karna chaahiye ke ham jo baatein hadees ke naam se padhte hain woh Rasoolullah (ﷺ) ka farmaan hai. Rasoolullah (ﷺ) ke farmaan ko bilkul usi tarah adab aur ehteraam se padhna aur sunna chaahiye taake ham Huzoor (ﷺ) ke akhlaaq wa ausaaf ke saath aaraasta ho jaayein aur Aap ki naapasandeeda cheezon se bach jaayein. Neez hadees padh kar hamein doosron tak pohnchaana chaahiye, taake ham Aap ki dua ke haqdaar ban jaayein.

Rasoolullah (ﷺ) ne hadees sunne aur us ko yaad karne aur doosron tak pohnchaane waale ko dua di hai; chunaancha Aap (ﷺ) ka irshaad hai: Allah paak us shakhs ko tar-o-taaza aur shaadaab rakhe jis ne hamaari koi hadees suni, phir hoobahu doosron tak pohncha di, kyun ke bahot se log jin tak hadees pohnchaai jaati hai woh sunne waale se ziyaada yaad rakhe waale hote hain.

[Tirmizi: 2657, Abdullah bin Masood (رضي الله عنه)]

Rasoolullah (ﷺ) ki isi dua ki wajah se bahot se hadees padhne padhaane waale logon ke chehre duniye hi mein pur raunaq ho jaate hain. Hamein bhi Hadees-e-paak ka ilm bahot hi adab ke saath haasil karna chaahiye, taake hamein bhi Allah Ta'ala in barkaton aur rahmaton se nawaaze jo us ke pyaare Rasool ki hadees padhne padhaane waalon ko milti hai.