Seerat

Seerat : Humaare pyaare Nabi Hazrat Muhammad (ﷺ) ki zindagi ke haalaat ko "Seerat" kehte hain.

Tarjama : Yaqeenan tumhaare liye [Rasoolullah(ﷺ)] ki zaat mein ek behtareen namoona hai.

Hadees : Rasoolullah (ﷺ) ne farmaaya : Tum mein se koi shakhs us waqt tak kaamil momin nahin ho sakta jab tak ke main us ke nazdeek us ke waalidain, bachchon aur tamaam logon se ziyaada mehboob na ho jaaun.

[Bukhari: 15, Anas (رضي الله عنه)]

Allah Ta'ala ne Nabiye Kareem (ﷺ) ko qiyaamat tak aane waale tamaam insaanon ki hidaayat ke liye bheja hai, neez Aap (ﷺ) ittiba ko duniya wa aakhirat ki kaamiyaabi aur apni raza ke liye zaroori qaraar diya. Aap (ﷺ)ki ke tareeqon ko maaloom kar ke un ki ittiba usi waqt mumkin hai, jab ke Aap ki muhabbat humaare dilon mein ho. Is ke liye zaroori hai ke Aap ki seerate paak aur Aap ke buland akhlaaq wa sifaat ko jaanein aur unhein maaloom karein; taake Aap ki muhabbat humaare dil mein paida ho aur us ki wajah se Aap ki sunnaton ka ittiba humaare liye aasaan ho jaaye. Seerate Nabawi nihaayat paakeezah mauzu hai. Is se humein maaloom hota hai ke humaara deen kin maraahil se guzra, Aap ne is ki hifaazat ke liye kitni takleefein bardaasht kein aur Allah Ta'ala ne kis tarah madad farmaayi.