Masaail

Masaail: Deen ki woh baatein jin mein amal ka tareeqa ya us ka saheeh aur galat hona bataaya jaaye, un ko “Masaail" kehte hain.

Namaaz : Ek khaas andaaz mein Allah ke saamne apni bandagi ka izhaar karne ko "Namaaz" kehte hain.

Targeebi Baat

Hadees : Hazrat Abu Zar (رضي الله عنه) kehte hain ke Rasoolullah (ﷺ) ne mujh se farmaaya: Abu Zar! Agar ilm ka ek mazmoon seekh lo, khwaah us waqt us par amal ho ya na ho (jaise paani ke hote huwe tayammum ke masaail seekhna) to hazaar rakaat nawaafil padhne se afzal hai.

[Ibne Maaja: 219]

Rasoolullah (ﷺ) ne farmaaya : Allah Ta'ala ne paanch namaazein farz ki hain, jo shakhs achchhi tarah wuzu kare aur waqt par namaaz padhe, ruku bhi achchhi tarah kare aur khushu se padhe to Allah ke zimme hai ke woh us ki magfirat kare aur jo aisa na kare us ki Allah par koi zimmedaari nahin, chaahe magfirat kare chaahe azaab de.

[Abu Daawood : 425, Ubaada bin Saamit (رضي الله عنه)]

Ilm Allah ki badi ne'mat hai. Isi ke zariye insaan ko zindagi guzaarne ka saheeh raasta maaloom hota hai aur zindagi ke har sho'be mein saheeh aur galat ki tameez hoti hai, isi ilm ke zariye halaal aur haraam ki pehchaan hoti hai, is liye har musalmaan mard aur aurat par is ka seekhna zaroori hai.

Deen ki sab se ahem ibaadat namaaz hai.

Namaaz ka darja Deen mein aisa hai jaisa ke sar ka darja badan mein. Namaaz mein Allah Ta'ala ne duniya wa aakhirat ki kaamiyaabi ke waade rakhe hain. Namaaz padhne par Allah achchhi zindagi aur rozi mein barkat ata farmaate hain, namaaz humaare Nabi ki aankhon ki thhandak hai, namaaz Jannat ki kunji hai, qiyaamat mein sab se pehle Namaaz hi ka hisaab hoga, jis ki namaaz saheeh niklegi, us ke baaqi aamaal bhi saheeh niklenge aur jis ki namaaz saheeh nahin hogi us ke baaqi aamaal bhi saheeh nahin honge, lihaaza namaaz saheeh tareeqe par seekhna, jaanna, saheeh tareeqe par padhna aur us ka ehtimaam karna har musalmaan par zaroori hai.